பழக்கம்

பள்ளிச் செல்லும் பாலர் புரிதல்

வல்ல மைதான் வளரா ததாலே 

சொல்லி வைத்தனர்  சிறார்க்குப் பள்ளியில்

பல்தான் விழுந்தால் பள்ளம் தோண்டிப்

புதைத்திடு மீண்டும் புதுப்பல் முளைக்கவே

கதைதான் எதைதான் காக்கப் புனைந்தது

விழுங்கி விட்டால் விளையாட் டாய்பின்

எழும்தீ  மைகள் எண்ணிச்   சொன்னது

முழுதும் அறிந்த முன்னோர் மனிதர்

பழுதற வாழவே  பழக்கம் பலவே

செய்தனர் பழகியே சிறப்பாய் வாழ்வோம்

மெய்மை அறிவு விளையும் வரையே

மனித எடைக்கல்

வத்திக் குச்சி வளர்தீ விரலைக்
கொத்திட உடல்மனம் குதிப்பது போலே
சிலபேர்   நடுங்கச் செய்வர் கண்டதும்
உளம்வளம் மதிப்பிடும் ஒருவாய்ப் பென்று
மனதிடம்  மதிப்பிடும் மனித எடைக்கல்
எனமனம்   அவரை எண்ணிட இன்பமே 

மனம்

கடற்கரை மணலில்  கால்களைக் கடல்நீர்
தடவிச் செல்லத், தடுமாறும் மனம்போல்
ஏன்என்   நெஞ்சில்  எதையோ தொலைத்தது
போன்று, பிரிந்தது  போன்று, தோன்றுதே 

இறை வணக்கம்

தலைக்குள் திட்டம் தரைமேல் இறக்கிட,
மலைபோல் தடைகள்; மனதிடம் காத்திட 
உன்அருள் வேண்டும், உழைக்கத் துவங்கினேன்
உன்னை நம்பியே; ஒன்றும் அறிந்திலேன்; 
எவ்விதம் செய்தால் இனிதாய் முடியுமோ, 
அவ்விதம் செயல்கள், அமைந்திட அருள்கவே.

மனம்

தேவை தீரவேத் தேடிப் பழகிடும்,
தேவை தீர்ந்ததும் திரும்பிப் பார்த்திடா,
மனித மனத்தின் வகைகள் பலப்பல...
இனிஎன் வகையுடன் இணைந்திடல் நன்றே...