முயற்சி

ஒன்று அடைந்திட, ஓயா முயற்சியில்,

என்று அடைவேன் இறையே யறியேன்.

அறிவு அறியா அழையா தடைகள்;

முறிவு நிகழாது முன்னேற, தாய்போல்,

முயற்சி குறித்தப்பி முட்டாமல் நீள,

பெயர்ச்சி செயவே, பிடித்தது சேர்க்கவே,

உற்ற துணையாய், உளாய்யென நம்பியே,

வெற்றி வரைக்கும் விடாது முயல்வேன்,

இடுப்பி லிருந்து இறக்கிட ஓடும்

துடுக்குக் குழந்தையைப் போல்.

"தெய்வ நம்பிக்கை".

எதிர்பாரா சூழல், எதிர்காலம் தாங்கும்

புதிர்விடை; யார்க்கு புதிர்பின் விடைமுன்.

நிகழ்பவை யாவுமே நேற்று நிகழ்வின்

தகவல் சுமந்திருக்கும், தப்பினால் நாளை

நிகழ்வின் அறிகுறி; நீயே கதியென

தெய்வ நினைவில் செயல்படும் யாவரும்

செய்யும் செயல்கள் திருத்தமாய் செய்ய

உணர்வால் உணர்த்துவார் உள்நின்று காக்கும்

உணர்வு மொழியில் உரையாடும் அப்பன்.

திடமாக நம்பினால், தெய்வ மடியில்

கிடக்கும் மழலை வாழ்வு.