தெய்வம்

நாளை என்ன நடக்குமென்று 

காலை பொழுதே  காண்பா ரில்லை

நேற்று நடந்த நிகழ்வை  தெளிவாய்

வேற்றுமை  யின்றி விளம்புவா ரில்லை

செய்த  செயலின் தீர்ப்பே பலன்கள்

செயல்பலன் தொடர்பு தெரியா அறிவில்

செய்த  திட்டம்  சிதறும் போது

தெய்வம் நம்பி திடமாய் முயல்க

திருத்தம் செய்து சிறப்பாய் அமைத்து 

கருத்தாய் காக்கும் கவலை விடுக

இன்றே  நாளை எட்டிப் பார்த்து

என்ன நன்மை என்ன தீமை

நேரு மென்று  நெஞ்சம் சொன்னால்

யாரும் தெய்வம்  என்றே எண்ணார்.

இயற்கை முறை

கதிரவன் தோற்றம் கலைக்க தூக்கம்
மதியதன் தோற்றம் மறுபடி தூங்க
வெயிலில் உழைக்க வேண்டிய வலிமையை
துயிலில் பெற்றிடும் துயரிலா வாழ்க்கை
இயற்கை முறையின் எதிர்திசை சென்று
செயற்கை முறையில் செய்த செயல்கள்
சேர்ந்து வலுத்து சீறிப் பாய
தேர்ந்து  செயல்பட தெரிந்தவர் சிலரே..

எதனில் ஆற்றல் இயல்பாய் இருக்குமோ,
அதனை தொழிலாய் ஆக்கி வருவாய்,
உதவிகள் செய்து உறவுகள் வளர்த்து,
பதற்ற நேரம் பாசம் காட்டி,

உடல்நோய் எதிர்ப்பு உறுதிசே மிப்பு
கடத்தினர் நாளை காத்தனர் இடரையே..!!!